Neobična formacija stijena na sjeverozapadu Islanda nosi brojne nadimke, među kojima su i dinosaurus, zmaj, slon, nosorog... Na šta vas najviše podsjeća?
Na sjeverozapadu Islanda, nedaleko od poluostrva Vasnes (Vatnsnes), nalazi se Hvitserkur – popularno nazvan i "Islandski dinosaurus". U pitanju je formacija bazaltnih stijena visine 15 metara i neobičnog oblika, sa dvije rupe na dnu zbog kojih podsjeća na dinosaurusa (ili zmaja) koji kao da pije vodu.
Hvitserkur na islandskom znači "bijela košulja", a ovaj neobičan naziv stijena duguje pticama koje se na njoj gnijezde – bijelim morskim pticama iz roda Fulmarus, kao i brojnim galebovima. Naime, na prirodno crno-sivkastoj stijeni se nalaze nataložene naslage ptičjeg izmeta (gvano) koje su bijele boje.
Temelji ovog spomenika prirode su ojačani betonom, kako bi se zaštitio od erozije talasa i slane vode.
Ovaj dio Islanda nije gusto naseljen, a grad najbliži Hvitserkuru ima svega 50.000 stanovnika. Stanovnici obližnjih ruralnih naselja veoma su ljubazni i spremni da ugoste znatiželjne turiste. Jedan od savjeta koji će vam dati je da sa sobom ponesete neki štap ili kišobran kako biste se "odbranili" od zaštitnički nastrojenih polarnih čigri koje su brojne na ovom lokalitetu.
Polarna ili arktička čigra je nacionalna ptica Islanda koja se nalazi i na njihovoj poštanskoj marki. Mještani ih obožavaju upravo zbog njihove zaštitničke prirode. Arktičke čigre su veoma agresivne prema svima koji pokušaju da se približe njihovim gnijezdima, čak i gnijezdima drugih ptica.
U blizini Hvitserkura se nalazi i jedna od najvećih kolonija foka na Islandu. Bogatu faunu ovog mjesta čine brojne autohtone vrste morskih ptica, ali i plave i zlatasto-žute meduze koje plima nanosi na obalu.
Najbolje vrijeme za posjetu ovoj skrivenoj destinaciji je od polovine septembra do polovina aprila. U tom periodu su na Islandu noći potpuno mračne, pa možete uživati u spektakularnoj polarnoj svjetosti, piše World Atlas.
