Poljaci se bune protiv sječe posljednje evropske prašume (FOTO)
Oko 2.000 Poljaka, prema procjenama organizatora, izašlo je na ulice poljske prestonice u “Marš Enta”, na poziv nekoliko ekoloških organizacija, noseći nacionalne i zastave Evropske unije.
U protestni pohod centrom Varšave izašle su danas stotine Poljaka, među njima i Enti iz Tolkinovog “Gospodara prstenova”, zbog planirane obimne sječe drva u poljskom dijelu posljednje evropske prašume, Bjalovješkoj prašumi, koju su najavile nove poljske vlasti.
Na čelu povorke istaknut je veliki transparent s natpisom “Još prašuma nije umrla”, što je parafraza prvih riječi poljske himne.
“Enti će odbraniti Poljsku”, “Enta za predsjednika” poručili su demonstranti, od kojih su se mnogi prerušili u to mistično oživjelo rastinje iz epske fantastike “Gospodara prstenova” Džona R.R. Tolkina. Uz Ente, kao duhovite branioce Bjalovješke prašume, posljednjeg tako velikog ostatka šuma koje su nekada pokrivale cijelu Evropu, u pohodu protiv sječe drva pojavili su se demonstranti prerušeni u vjeverice, rode i druge životinje.
Pod parolom “Nije bilo vas, bila je šuma”, demonstranti zahtijevaju od premijerke Beate Šidlo da povuče dozvolu da limiti za sječu budu pet puta veći nego do sada, što znači da će iz Bjalovješke šume u narednih deset godina moći da posijeku 317.800 kubnih metara drva umesto 63.400 kubika koliko je bio desetogodišnji limit do sada. “Pravdanje sječe brigom za šumu je najobičnije licemjerje i laganje ljudi. Iza toga stoje isključivo ekonomski razlozi, ali narodno blago ne može da se preračunava na novac”, kazala je Katažina Jagelo iz poljske podružnice međunarodne ekološke organizacije Grinpis.
Ministarstvo životne sredine uvjereno je da su u posljednjem tako velikom netaknutom šumskom kompleksu ipak potrebne intervencije čovjeka, dok ekolozi upozoravaju da je poljsko-bjeloruska Bjalovješka prašuma dragocjena i da predstavlja blago i evropske i svjetske prirodne riznice upravo zato što je pošteđena aktivnosti čovjeka.
Prašuma, upisana zbog bogatstva flore i faune i u svjetsku baštinu pod zaštitom UNESKO, obuhvata oko 1.500 kvadratnih kilometara na granici Poljske i Bjelorusije, od čega je 42 odsto zaštićenog rezervata na poljskoj teritoriji. Upravo u Bjalovješkoj prašumi obnovljena je vrsta evropskih bizona, gotovo izumrla 1923. godine. Od 12 tih divljih bikova iz zooloških vrtova i zvjerinjaka, njegova populacija danas broji 5.200 evropskih bizona na cijelom svijetu. U Bjalovješkoj prašumi, na poljskoj strani, na slobodi živi preko 500 jedinki.
Izvor: Kurir.rs
